قبل القراءة
اضغط لايك لصفحتنا علي الفيس بوك ليصلك اخر تدوينات المدونة
تدريب طفل التوحد على عملية الشراء
🍬🍭🍫💰
معظم الأمهات بيكون شغلها الشاغل في بداية التدريب هو ان الطفل ينطق وبعد ما يتكلم نبتدي نركز علي الأكاديمي علشان المدرسة ده كلام جميل بس برده مهم تدريب الطفل علي المهارات الحياتية والإجتماعية لأني بشوف أطفال وصلت لسن 11 سنة وأكتر ومابيقدرش يخدم نفسه أو يتعامل مع المجتمع طيب هنعمل ايه ؟
في برامج تدريب علي المهارات دي وده برنامج منهم
إزاي ادرب ابني علي انه يتعامل مع السوبر ماركت ؟ هنقسم التريب بتاعنا 3 مراحل :
المرحلة الأولي هي مرحلة البيت :🏠
تحضير التدريب👇
مهم قبل بدأ التدريب يكون الطفل علي الأقل عارف فئات النقود ( جنيه ,خمسة ,عشرة ..الخ)
هنبدأ التدريب بإننا هنجهز في البيت نموذج صغير لسوبر ماركت
نحط علي رف شوية حاجات زي بسكويت أو كيك وغيرهم
هنجيب باسكيت صغير زي بتاع التسوق
نخلي حد يعمل دور الكاشير أو البياع بابا مثلاً أو أخو الطفل
بدأ التدريب ▶️
في البداية خلي الطفل يشتري حاجة واحدة بس بفئة واحدة محددة من الفلوس
مثال (خليه يشتري بسكويت بس ويدفع جنيه واحد بلاش في البداية موضوع جنيه ونص أو 2 جنيه خلينا نتعامل بفئة واحدة جنيه أو خمسة جنيه أو عشرة بلاش كسور دلوقتي)
1- هنبدأ التدريب بأننا نقول للطفل (يلا هنشتري بسكويت 🍪) ومهم نحدد الحاجة اللي هنشتريها وهقولك ليه بعدين , اديله الفلوس وقوله معاك كذا (الفئة اللي معاه) وقوله (حطها في جيبك) واساعده في انه يحط الفلوس في جيبه
2- هنساعد الطفل ياخد الباسكيت قوله (جيب باسكيت) ونروح للرف اللي عليه البسكويت
3- نقف قدام الرف وقوله (جيب بسكويت) وساعده يجيب البسكويت بعد مايجيب الطفل قوله (حط في الباسكيت) وخليه يحط في الباسكيت وتوقع انه هيكون عايز ياكله في وقتها فهتقوله (إدفع الفلوس الأول) ووجهه ناحية البياع
4- نقف عند البياع اللي هو بابا أو اخوه مثلاً خليه يرفع الباسكيت وقوله (قول كام؟)
5- البياع يقول السعر فهنساعد الطفل ونقوله (طلع الفلوس وإدفع) وهو بيدفع قوله (قول إتفضل)
6- في مرات تانية تدي الطفل فئة أكبر من المطلوب يعني الحاجة بجنيه اديله خمسة جنيه وبعد الدفع خليه ياخد الباقي يحطه في جيبه (قوله خد الباقي) بعد ما ياخده (قوله قول شكراً)
7- بعد كده نسحب المساعدات بالتدريج لحد ما الطفل يقدر يقوم بالخطوات اللي فاتت لوحد ووبعد كده نبدأ خطوة
8 - في الخطوة دي هنرود صعوبة الموضوع شوية يعني خلي الطفل بدل مايشتري حاجة يشتري حاجتين ( قوله هنشتري بسكويت وعصير 🍪🥤) وبدل ما يدفع فئة واحدة يدفع عدد مكرر من فئة يعني مثلاً 3 جنيه وتكون مديله خمسة جنيه فكة ( جنيهات) فيطلع ويعد 3 جنيه يدفعهم ويحط الباقي في جيبه
بعد مايعدي المرحلة دي نبدأ المرحلة الثانية
المرحلة الثانية : (الخروج لمحل البقالة)🏃♂️🏪
في المرحلة دي هنخرج للشارع بس نحاول نختار في البداية محل صغير علشان مايكونش فيه معروضات كتيرر مشتتة للطفل أو يكون زحمة
التحضير للتدريب 👇
قبل مانخرج هنقول للطفل (يلا هنروح السوبر ماركت) واعرض عليه صورة السوبر ماركت ودي ممكن انت تاخد الطفل قبلها وتروح بيه السوبر ماركت وتصوره هناك وتغلف الصورة , وبعدين قوله (هنشتري بسكويت) برده هنحدد هنشري ايه بالزبط مش بس كده احنا هناخد صورة البسكويت معانا أو الغلاف بتاعه هقولك ليه دلوقتي , ده لسببين مهمين ✌️
السبب الأول: إن ده هيمنع سلوك إن الطفل يروح يختار حاجة انت مش عايزه يشتريها لأسباب صحية مثلاً زي البيبسي فإحنا حددنا قبل مانروح احنا هنشتري ايه علشان السبب ده
ولو روحت هنا ولقيت الطفل خد حاجة تاني طلع الصورة وفكره (قوله احنا اتفقنا هنشتري ايه ؟ ووريله الصورة وقوله بسكويت)
السبب التاني: في إني خدت الصورة معايا لإن بعض الأطفال هتنسي علي ماتروح السوبر ماركت فلما يكون معاه صورة الحاجة يفتكر من خلالها هو جاي يشتري ايه زي بالزبط لمه بنكتب ورقة بالطلبات قبل مانروح نشتريها بس الطفل هتكون الصور أفضله (بعض الأطفال ممكن تتعامل بالكلمات بدل الصور)
كمان هندي للطفل الفلوس وقوله (خد الفلوس) بعد ماياخدها قوله (حطها في جيبك) وساعده يحطها في جيبه
إجراءات التدريب ▶️
هنكرر نفس الإجراءات اللي فاتت مع سحب المساعدات بالتدريج لكل خطوة يعني مثلا بعد ماكنا بنساعد الطفل يجيب الباسكيت هنخليه لوحد ياخد الباسكيت ونساعده في باقي الخطوات
بعد كده نخليه ياخد الباسكيت ويروح عند الرف اللي فيه الحاجة لوحده ونساعده في باقي الخطوات وهكذا لحد مانوصل إننا بنستني الطفل علي باب المحل وهو بيعمل كل حاجة لوحده
هنلاحظ اننا بجانب برنامج الشراء أخدنا حاجات تاني زي ان الطفل يستخدم لغة إجتماعية (إتفضل , شكراً) وكمان ممكن نضيف مهارات زي تسمية الأشياء في البيئة المحيطة واحنا رايحين السوبر ماركت (شجرة , عربية....الخ)
المرحلة الثالثة (التعميم في محلات أكبر)
هنعمل نفس الخطوات اللي فاتت ولكن في سوبر ماركت كبير وممكن هنا تقابلنا زحمة علي الكاشير مثلاً فهتكون فرصة لتعميم مهاة إجتماعية مهمة وهي إنتظار الدور فهنقول للطفل (اقف في الطابور) ولو حاول يخرج بره الطابور ويروح يدفع (قوله استني دورك)
